२४ भदौ, मायागढी । नेपाल विद्युत प्राधिकरणले म्याग्दीमा निर्माणाधीन १३२ केभी क्षमताको डाँडाखेत–राहुघाट प्रसारण लाइन आयोजनामा ५० प्रतिशत भौतिक प्रगति भएको जानकारी दिएको छ। ठेकेदार भारतीय कम्पनी लार्सन एन्ड टुबेरो (एलएनटी) लाई ३० महिनाभित्र काम सम्पन्न गर्न भनिए पनि अब १५ महिना थप गरिएको छ।
डाँडाखेत (मालिका गाउँपालिका-७) देखि रघुगंगा गाउँपालिका–३ अम्बाङ जोड्ने २५ किलोमिटर लामो प्रसारण लाइनको निर्माण सन् २०२१ को डिसेम्बर ३१ मा सुरु भएको थियो। आयोजनाको प्रमुख रोशन अग्रवालले आगामी नोभेम्बर १६, २०२५ सम्म ठेक्का अवधि थपिएको जानकारी दिए।
डाँडाखेत सबस्टेसनको निर्माणमा ६० प्रतिशत प्रगति भइसकेको छ भने राहुघाटमा ढिलाइ भएको छ। राहुघाट सबस्टेसनमा सामुदायिक विवाद, जग्गा व्यवस्थापन र डिजाइने समस्याले काम ढिलो भएको हो। यसका लागि नेपाली उपठेकेदार कम्पनी डीएल स्ट्रक्चरले कामको जिम्मेवारी लिएको छ।
एशियाली विकास बैंकको ऋणमा निर्माणाधीन प्रसारण लाइन र सबस्टेसनका उपकरणहरू आयात भइसकेका छन्, र अबको चुनौती निर्माणको गति बढाउनु हो।
मायागढीमा १७२.८ मेगावाट क्षमताका चार जलविद्युत आयोजना निर्माण भइरहेका छन्। तर सबस्टेसनको ढिलाइले जलविद्युत आयोजनाहरूमा असर परिरहेको छ, जसमा ३५.५ मेगावाटको राहुघाट–मङ्गले, ४८.५ मेगावाटको माथिल्लो राहुघाट लगायतका आयोजना छन्।