जब उत्कृष्टताको कदर हुँदैन, तब प्रतिभा छायाँमा पर्छ, र समाजले ठूलो क्षति व्यहोर्नुपर्छ।
बाल्टिमोर, मेरिल्याण्ड – अन्तर्राष्ट्रिय नेपाली कलाकार समाज (ईनास) अमेरिका च्याप्टरले हालै एक भव्य समारोह आयोजना गर्यो, जहाँ विभिन्न क्षेत्रमा उल्लेखनीय योगदान पुर्याउने १६ व्यक्तित्वहरूलाई ‘ईनास राष्ट्रिय सम्मान २०२५’ बाट विभूषित गरियो। यो सम्मान, केवल एक औपचारिक कार्यक्रम मात्र नभई, नेपाली कला, संस्कृति, र समाजसेवाको क्षेत्रमा समर्पित व्यक्तिहरूको त्याग र समर्पणको उच्च मूल्याङ्कन थियो।
शनिबार सम्पन्न उक्त समारोहमा अमेरिकामा रहेर नेपाली भाषा, संस्कृतिको जगेर्ना, खेलकुदको विकास, व्यवसायको प्रवर्द्धन, र समाजसेवामा अनवरत लागिरहेका व्यक्तित्वहरूलाई सम्मान गरिएको थियो। ईनास अमेरिकाका अध्यक्ष राहुल केसीको सभापतित्वमा सम्पन्न भएको उक्त कार्यक्रममा ग्लोबलकी संरक्षक नीता श्रेष्ठको विशेष उपस्थिति रहेको थियो। कार्यक्रममा स्थानीय राज्य निकायका सिनेटर, डेलिगेट्स, र विभिन्न संघसंस्थाका पदाधिकारीहरूको सहभागिताले यसको गरिमालाई अझ उच्च बनाएको थियो।
सम्मानित हुने व्यक्तित्वहरूमा फिल्ममार्फत मानवअधिकार र संस्कृति प्रवर्धनमा योगदान दिने पूर्णसिंह बराइली, ललितकलाका साधक राजेन्द्र केसी, उदीयमान गायिका आश्रा कुँवर, दृष्टिविहीन भएर पनि आफ्नो प्रतिभा प्रदर्शन गरिरहेका सुजन ढकाल, र संस्कृति प्रवर्धनमा सक्रिय संस्था ‘नेपाल पासा पुचः अमेरिकाय’ रहेका थिए। यसका साथै, गीतकार तथा साहित्यकार अम्बिका गुरुङ, स्वयमसेवामा समर्पित रुबी पौडेल र अपेक्षासिंह परियार, समाजसेवी विजया शाह, उद्यमी तथा समाजसेवी अमर छन्त्याल, नृत्य कोरियोग्राफर नवीन केसी, पत्रकार तथा अधिकारवादी सच्ची मैनाली, तेक्वान्दो खेल प्रवर्धनमा सक्रिय दम्पती कुमार र कल्पना कार्की, वरिष्ठ गायक प्रकाश श्रेष्ठ, पार्कर खेलाडी दिनेश सुनाम, र फिल्म अभिनेत्री दिब्या रायमाझीलाई पनि ईनास अमेरिका राष्ट्रिय सम्मान २०२५ प्रदान गरिएको थियो।
कार्यक्रममा रेडकार्पेटमा पञ्चैबाजासहित पाहुनाहरूको स्वागत गरिएको थियो। गुरुङ र नेवार समुदायले झाँकी बाजामार्फत सांगीतिक प्रस्तुति दिएका थिए, जसले उपस्थित सबैलाई मोहित तुल्यायो। अमेरिकामा जन्मिएको पछिल्लो पुस्तादेखि नेपालबाट त्यहाँ पुगेको अघिल्लो पुस्तासम्मको सहभागिताले कार्यक्रमलाई थप जीवन्त बनाएको थियो। यस अवसरमा फिल्म ‘तेल भिसा’ र वेब-सिरिज ‘घर बट इन अमेरिका’को निर्माण टोलीलाई पनि सम्मान गरिएको थियो।
अमेरिका र युरोपका विभिन्न मुलुकबाट आएका कलाकारहरूलाई प्रमाणपत्रसहित सम्मान गरिएको थियो। बालकलाकारहरूले हिमाल, तराई, र पहाड झल्काउने आकर्षक नृत्य प्रस्तुत गरे, जसले दर्शकहरूको मन जित्यो। राष्ट्रिय कलाकारहरूको सामूहिक गायन प्रस्तुतिले श्रोताहरूलाई भरपूर मनोरञ्जन प्रदान गरेको थियो।
ईनास ग्लोबलका प्रवक्ता प्रकाश तिवारीले संस्थाको स्थापनाको उद्देश्य र इतिहासबारे जानकारी गराउँदै यस संस्थाले नेपाली कला र संस्कृतिको संरक्षणमा खेलेको भूमिकाको चर्चा गरे। यो सम्मानले भविष्यमा पनि नेपाली कला र संस्कृतिको प्रवर्द्धनमा लाग्न सबैलाई थप प्रेरणा दिने विश्वास व्यक्त गरे।
